Владимир Николов е композитор чие творештво опфаќа широк спектар на изразни средства и жанри, користејќи ги искуствата во класичната музика и џезот како точка на поаѓање. Веќе подолго време е "зад сцената" во улога на аранжер во светски оркестарски проекти, но често настапува и како диригент и гитарист со реномирани солисти и ансамбли

Роден е во Скопје, 1979 година. Со музика започнува на 14-годишна возраст, како гитарист. По кратки подготовки запишува студии по класична гитара кај Вера Огризовиќ и Пабло Барон, дипломирајќи со оригинална композиција. Во меѓувреме започнува со композиција и аранжирање, длабоко инспириран од приватните часови и менторството на Илија Пејовски. По заминувањето за Холандија есента 2002-ра, започнува студии по џез композиција и аранжирање со Јуре Хаанстра, на Амстердамскиот Конзерваториум, дипломирајќи со целовечерен авторски Биг Бенд концерт (2004). Магистерските студии ги завршува во 2005-та година, со фокус на пишување за симфониски оркестар

Како композитор и аранжер соработува со врвни оркестри и ансамбли, меѓу кои и Metropole Orkest, Magogo Kamerorkest, Brussels Philharmonic, Pophorn Big Band, Beogradska Filharmonija, Orchestra Jazz della Sardegna, Jazz Orchestra of the Concertgebouw. Меѓу позначајните музички имиња, соработува со: John Clayton, Randy Brecker, Conrad Herwig, Vince Mendoza, Chaka Khan, Gino Vanelli, Sertab Erener, и многу други

Често е вклучен и во филмски проекти како оркестратор и музички уредник, меѓу кои и: The Artist (FR), Панкот не е мртов (MK), Pipo en de p-p-Parelridder (NL). Како гитарист, пијанист и диригент настапува со најразлични ансамбли, меѓу кои CvA Big Band, Trojka, Official Language, Berlin Art Orchestra и Schultzing

Добитник е на повеќе интернационални награди, меѓу кои две први награди за оригинални композиции и пет за омажи на големите џез композитори Thelonious Monk, Wayne Shorter, John Coltrane, David Liebman и Steve Swallow

Како предавач (по солфеж, хармонија и аранжирање, џез ансамбли) работи вонредно на Амстердамскиот Конзерваториум во Холандија. Исто така, предава аранжирање, џез ансамбли и солфеж на џез отсекот на Факултетот за Музичка Уметност во Штип, како и на ESRA, Скопје. Често е и водач на бројни работилници за млади џез музичари во Европа